Debatt om Norges krig i Afghanistan er nødvendig og riktig, skriv Avisa Nordland på leiarplass. Ja, fleire gonger i same artikkel.

 

Ka er så avisa sitt eige bidrag til debatten? Det går stort sett ut på å gjenta at Norge må vere med på krigen langt inn i evigheita. Alternativet er at terroristane kjem ned frå fjella og tar oss. Dessuten har krigen ”solid oppslutning i befolkningen”, kan avisa fortelle. (Den norske, altså)

 

Kanskje kunne Avisa Nordland starte debatten med å opplyse korfor avisa var mot invasjonen i Afghanistan etter 11. september 2001 da grunngivinga var å forsvare USA mot angrep, mens avisa mange år etter er for å krige i Afghanistan inntil all motstand mot invasjon og okkupasjon er lagt i grus?

 

Etter seks års norsk krigføring i Afghanistan med støtte frå alle parti på Stortinget og alle større medier, har det for første gong lykkes å få fram ei meiningsmåling med fleirtal for krigen. Og da var ordet ”krig” erstatta med ”operasjoner”. Talrike målingar med motsett resultat har knapt blitt referert.

 

For noen tiår sia greide den engelske, franske, belgiske og portugisiske overklassen lenge å få eigne innbyggarar til å ”slutte opp om forsvaret av våre gutter” når innfødde mørkemenn gjorde opprør mot koloniveldet. Også under USAs krig i Vietnam lykkes denne hjernevasken noen år. No prøver Støre og Jensen med Halvorsen og Avisa Nordland på laget det same – i humanismens og Nato-solidaritetens namn. Som før er det verken botn eller ende i logikken. Vi produserer heile tida dei nye mørkemenn og terroristar som skal til for å halde fram med ”å forsvare oss” – på den andre sida av jorda.

 

Men i Natos glansperiode, da måtte USA greie sine imperialistiske eventyr uten at det var på tale å stille opp med fly og soldatar frå Norge.

 

No slår dei høge herrar og damer ring om vår nye ærefulle rolle – som leverandør av leigesoldatar for USA.

 

Som ein pensjonert offiser i flyvåpenet svarte da eg peika på at avskjeringsflya i Bodø er bygd om til bombefly etter den kalde krigen: ”Du skjønner, det er ikkje etterspørsel etter anna enn bombefly no.”

 

 

 

 

Relevante linker

 

"Hent soldatene hjem" - underskriftskampanje

 

Opprop mot krigen i Afghanistan - Klassekampen